O ano 2020 foi, sen dúbida, un gran desafío para todos, pero para a Unión Europea foi algo máis: unha proba de fogo que demostrou como a construción europea avanza nos momentos de maior crise. Malia o peche das fronteiras por parte de moitos países - que en Galicia afectou especialmente aos municipios fronteirizos con Portugal-, os esforzos da UE para garantir a subministración de material médico e asegurar a circulación de bens e servizos esencias foron moi importantes para facer fronte a pandemia, así como os máis de mil millóns de euros de investimento na investigación do tratamento da enfermidade e das posibles vacinas…

A pandemia provocou, ademais, unha crise económica que precisou de liquidez e de aumentar o gasto por riba dos límites habituais para apoiar os sectores máis afectados. A UE soubo activar os mecanismos de emerxencia existentes para permitir este gasto e habilitar novos instrumentos, como a creación dun marco específico de axudas públicas ou a introdución dunha flexibilidade case total na utilización dos fondos estruturais. Grazas a isto, puidemos apoiar as nosas pemes e autónomos, habilitar infraestrutura para o ensino a distancia ou equipar os nosos hospitais, por citar algúns exemplos.

Pero a magnitude da crise esixía unha resposta aínda máis contundente para a recuperación a medio de prazo. Tras intensos debates, en xullo a UE daba luz verde ao maior estímulo económico da súa historia coa aprobación dun plan de recuperación de preto de dous billóns de euros. Por primeira vez, a Comisión Europea vai emitir débeda pública en grandes cantidades co obxectivo de financiar os investimentos e reformas necesarios para conseguir unha verdadeira transformación verde e dixital, a nosa gran aposta para recuperarnos da crise. Soamente en subvencións, España pode optar a máis do dobre do que adoita recibir en fondos estruturais e deberá executalo en case a metade de tempo. Isto esixe grandes esforzos por parte de todas administracións e, por iso, dende a Xunta de Galicia comezamos xa en outono a identificar grandes proxectos tractores e a mobilizar os diferentes axentes para conseguir esa transformación na nosa comunidade.

Nesta tarefa foi imprescindible o labor da Fundación Galicia Europa, tanto para explicar a resposta europea á crise económica e sanitaria, como para servir de ligazón coas institucións comunitarias. Boa mostra disto é a elaboración dos preto de 70 boletíns electrónicos e a organización de 14 encontros virtuais baixo o nome “Galicia na recuperación económica da UE”, así como de 11 reunións de alto nivel entre membros do goberno galego e altos funcionarios europeos.

En definitiva, e unha vez máis grazas á UE, temos unha oportunidade única para saírmos reforzados desta crise e para afianzar o modelo económico no que vimos traballando nos últimos anos, máis sostible, inclusivo e innovador.